Petri Bellonii Cenomani De aquatilibus, Libri duo cum iconibus ad viuam ipsorum effigiem, quoad eius fieri potuit, expressis. Ad amplissimum Cardinalem Castillionæum, Paris, Apud Carolum Stephanum, Typographium Regium, 1653. ,
Thynnus alius.
1. Lissam vel Glissam, à glabra & squamis carente cute Cretensium vulgus appellat, aliud Thynni genus, bicubitalis longitudinis humaníque corporis crassitiei, quod extra Cretam Copanum vocant: contorta fortassis à Scepano dictione: hunc enim esse Scepanum nihil vetat, quem Dorion Attagenem marinum appellauit: sed non est Oppiani Scepanus: est enim hic Thynnus planè pelagius, in alto mari degens, ac delicatissimi saporis: Scepanus verò litoralis ac cœnosus. Differt à maiore ac vulgari Thynno, quòd teretior est, branchiásque Pelamidis habeat, ac dentium loco rugosas atque asperas maxillas, pinnísque lateralibus, caudæ ac tergoris ad Sinagridem accedit: caudam tamen non usqueadeò lunatam gerit, sed magis bifurcam. Porrò interiores ipsius partes, sic ad maiorem Thynnum accedunt, ut etiam in hoc pylorum quadraginta & amplius apophisibus in gyrum circumuallatum facilè comperias. Eius formam tibi proponere superuacuum esse duxi, quòd tu priore contentus esse possis.