Copier dans le presse-papierPour indiquer l’adresse de consultation« Copier dans le presse-papierSource de référence, Ex Æliani Historia per Petrum Gyllius Latini facti, itemque ex Porphyrio, Heliodoro, Oppiano, tum eodem Gyllio luculentis accessionibus aucti libri XVI. De vi et natura animalium. Ejusdem Gyllii liber unus, De Gallicis et Latinis nominibus piscium, Lyon, apud Seb. Gryphium, 1533.
De Squillis. Cap. LXXVII.
1. Squillas, Caridas Græci nominant, et nisi forcipe carerent, Locustarum speciem similitudinemque gerunt. Harum triplex est genus, Gibbæ, Crangines, et parvæ, quæ ad majorem magnitudinem nunquam accedunt. Veneti Squillas quasdam vocant parvis Gammaris similes: sed recte nec ne, aliis judicandum relinquo. Easdem nostræ ætatis Græci etiam nunc Caridas vocant. Athenæus ait, Cammarum quoddam Caridum genus a Romanis nuncupari, idemque Caridas inquit reliqua corporis parte majus caput habere. Libellus falso quidem Apicio inscriptus, exiguæ tamen vetustatis retinens, Squillas et Cammaros testa obductos dicit: cum ex Aristotele sint crustacei generis: secutus Diphilum, et Athenæum, qui non tam religiose crustacea a testaceis distinguunt: quin, nisi mendum sit, aliquando Squillas, Astacos, Locustas, Cancros, Leones Ostracodermos vocent, id est, testa circunclusos: cum tamen ex Aristotele sint Malacostraci, hoc est, crustra obtecti. Plinius alias Herinaceorum tegmentum vocat crustam, alias testam: cum tamen Aristoteles religiose semper Herinaceos inter testaceos numeret.