Source de référence : , Liber de Moralitatibus, Girard J. Etzkorn
<Cap. 65 : De congruo>
1. 1. Sexagesimo quinto loco piscis ille qui dicitur congruus hujus condicionis est secundum Iorath De animalibus. Nam anguilla marina vocatur propter anguillarum lacualium similitudinem. Sapidus est et albus carne, sed multum resolutus et ideo non bene sanus maxime suas occasiones habentibus.
2. 2. Significat illos qui saporem veritatis et candorem castitatis apparenter habent in Ecclesia vel religione, et tamen in veritate non habent; immo resolvunt corrumpendo et fermentando quos aptos sive infirmos inveniunt. Tales erant Hymenaeus et Alexander, quos propterea apostolus tradidit Satanae, ut habetur I Tim. 1*. Talis fuit Torquatus, de quo habetur in legenda beati Tiburtii*.