Source de référence : Marcus de Urbe Veteri, Liber de Moralitatibus, Girard J.Etzkorn (éd.), St. Bonaventure University, New York, 2005

<Cap. 81 : De scarpa>

1. 1. Octogesimo primo loco piscis ille, qui vulgo dicitur scarpa, hujus est condicionis secundum Iorath. Nam squamis circumsaepta, bonis et colore et sapore, communiter est jucunda, frixurae etiam magis idonea.
2. 2. Significat viduas bonas in Ecclesia, virtutibus munitas, conversatione et aedificatione gratificas, compassioni et condescensioni infirmorum et afflictorum affectuose deditas. De talibus fuit mater Timothei, similiter et avia, sicut innuitur II Tim 1*. De talibus etiam fuit mater beati Gregorii et amica sua Tarsilla, ut habetur in libro Dialogorum*.