Source de référence : , Liber de Moralitatibus, Girard J. Etzkorn
<Cap. 84 : De lachia >
1. 1. Octogesimo quarto loco piscis ille qui dicitur lachia hujus est condicionis secundum Iorath De animalibus. Nam albus colore et quasi perfusus partim auro, lacteusque gratiosus est aspectu et sapidus gustu, pretiosus etiam et delicatus satis et debitae sanitatis.
2. 2. Significat virgines in Ecclesia sensibus castissimas, discretione et sapientia evangelica praeditas, exortatione sancta lacteas, conversatione gratiosas et aedificatione suavificas, unctione caelesti delicatas et praecipuas atque opinione sanas. Tales volebat virgines apostolus Paulus, I Cor. 7 quasi per totum. Tales monet debere esse virgines beatus Ambrosius in libro De sancta virginitate per totum*.